Pelica de Burra comeza unha xira de funcións dentro do ciclo FalaRedes da Secretaría Xeral de Política Lingüística

Pelica de burra, o espectáculo de estrea de Vero Rilo neste 2025, comeza esta semana unha xira por diversos concellos galegos dentro do programa FalaRedes, da Secretaría Xeral de Política Lingüística. A xira arrinca esta mesma semana en Ribadavia, o venres 4 de abril, e continúa o sábado en Ponteareas. 

Pelica de burra é un espectáculo-obradoiro de narración oral e música para primeira infancia, na que a narradora e educadora Vero Rilo está acompañada do músico Luís Iglesias. No espectáculo, o público viaxa no tempo ata o ano 2735; un futuro aterrador no que non hai contos, nin xogos, nin música. Nese contexto, Pelica de Burra viaxa ao pasado para atopar as palabras perdidas, a través da música, a narración oral, a tradición, os xogos de colo, os arrolos, e moitos contos. 

Vero Rilo é unha das narradoras orais máis destacadas da escena galega, con propostas para todo tipo de público e un repertorio de lingua, feminismo, tradición, memoria histórica, resistencia, alegrías, afectos e rebeldías. 

Bota un ollo aos seus espectáculos no noso catálogo.