A España neghra: Xácara para un Pícaro
Ficha artística
Dirección e texto: Nazan L. Bamio
Interpretación: Sandra Gade
Música (en directo): Álvaro Revuelto
Voz en off: Oğulcan Güzeller
Espazo sonoro: Wiloo
Música orixinal: Álvaro Revuelto
Dirección técnica: Marcos Carazo
Escenografía: Ana Montes de Miguel
Vestiario e atrezzo: Ana Montes de Miguel
Deseño de iluminación: Antúan del Toro
Gravación voz en off: DINAMIC STUDIO
Deseño gráfico: J. Carlos Degal
Sinopse
A España neghra: Xácara para un pícaro é unha conmemoración do poder festivo do teatro e unha celebración do Entroido que amosa un desfile de personaxes grotescos -que non estraños- que foi atopando o protagonista á súa chegada a Jacobusland.
A peza bebe das antigas tradicións dos romanceiros, cantares de cego, cantigas ou bululúes, co ánimo de presentar o teatro como o xogo que sempre foi. Unha indagación contemporánea sobre o feito de contar e o poder da imaxinación do público.
O proxecto representa unha destilación das principais tradicións teatrais como a commedia dell’arte, o teatro xestual, a biomecánica e o teatro de máscaras. A actriz, a xograresa LaGriot’te, destaca pola súa vis cómica e pola versatilidade, posto que dá vida a nove personaxes distintos, cada un co seu acento e idioma propio -como o galego e o andaluz- para dar voz á realidade plural da nosa cultura.
Todo acompañado do músico da compañía ambulante, que viste con mestría e delicadeza cada unha das escenas grazas a composicións orixinais para a obra. Da man dunha trompeta, un equipo de percusión e un teclado MIDI, recolle diversas tradicións folklóricas coma o chotis, a marcha de Semana Santa ou as cancións populares do manteo do pelele do Entroido.